ခန္တီစ၊ သည်းခံခြင်း မင်္ဂလာ ( ၅၅၀-ခန္တီဝါဒီဇာတ် )
သည်းခံခြင်းသည် မင်္ဂလာတစ်ပါး ဖြစ်၏။
တစ်နည်းအားဖြင့်-ကြီးပွားချမ်းသာခြင်း၏ အကြောင်း တစ်ရပ် ဖြစ်သည်။ အောက်ပါပုံဝတ္ထုကို သာဓကအဖြစ် တင်ပြအပ်ပါသည်။
လွန်လေပြီးသောအခါ ဗာရာဏသီပြည်ဝယ် ကလာဗုမင်း အုပ်စိုးသည်။ ထိုတွင် ကုဋေရှစ်ဆယ် ကြွယ်ဝသော ပုဏ္ဏားလုလင်တစ်ဦးရှိသည်။ ကုဏ္ဍလ လုလင်- ဟု အမည်တွင်၏။
ထိုလုလင်သည် အရွယ်ရောက်ချိန်၌ ပညာသင်ယူသည်။ ပညာများ တတ်မြောက်၍ မကြာမြင့်မီပင် မိဘနှစ်ပါး ကွယ်လွန်သွားရာ သတိသံဝေဂ ရသွားသည်။ သို့ဖြင့် ပစ္စည်းအားလုံးကို လှူဒါန်းစွန့်ကြဲကာ ဟိမ၀န္တာသို့ သွား၍ ရသေ့ဝတ်လျက် နေထိုင်သည်။
တစ်နေ့တွင် ရသေ့သည် ချဉ်ဆားမှီဝဲရန် ဗာရာဏသီပြည်သို့ ရောက်လာသည်။ စစ်သူကြီးက ကြည်ညိုသဖြင့် ရသေ့အတွက် မင်းဥယျာဉ်၌ ကျောင်း ငယ် ဆောက်ပေးကာ ကိုးကွယ်ထားသည်။
တစ်နေ့သ၌ ကလာဗုမင်းသည် အရက်သေစာ သောက်စားပြီးလျှင် ကချေသည်များ ခြံရံလျက် ဥယျာဉ်တော်သို့ သွား၍ စည်းစိမ်ခံစားသည်။ သူသည် မင်္ဂလာကျောက်ဖျာပေါ်၌ နေရာခင်းစေ၍ သူ့ချစ်သူ အမျိုးသမီးရင်ခွင်၌ ကျိန်းစက်သည်။ ကချေသည်တို့သည် သီဆိုတီးမှုတ်ကခုန်ရာမှ မင်းကြီး အိပ်ပျော်သောအခါ ဥယျာဉ်တော်သို့ လှည့်လည်ကြည့်ရှုကြသည်။
ထိုစဉ် အင်ကြင်းပင်ရင်း၌ ထိုင်လျက် တရားအာရုံပြုနေသော ရသေ့ကို မြင်ရာ ကြည်ညိုလှသဖြင့် ၀င်ရောက်ရှိခိုးကြသည်။ ဆိုဆုံးမရန် တောင်းပန်၍ တရားနာယူကြသည်။
အတန်ကြာသော် ကလာဗုမင်းသည် အိပ်ရာမှနိုးလာသည်။ ကချေသည်များကို မမြင်၍ သူ၏ချစ်သူကို မေးမြန်းသည်။ အမျိုးသမီးက အကျိုးအကြောင်း လျှောက် ထားသည်။ ထိုအခါ မင်းသည် ဒေါသ အမျက် ခြောင်းခြောင်း ထွက်သည်။ သန်လျက်ကို စွဲလျက် ရသေ့ထံ အပြေးအလွှား သွားရောက်သည်။ တရားဟောနေသော ရသေ့ကို တွေ့သော အခါ ဒေါသဖြင့် အော်ဟစ်မေးမြန်း သည်။
ရသေ့အား မည်သည့်ဝါဒကို ခံယူထားသနည်း-ဟု မေးသည်။ ရသေ့က ခန္တီဝါဒ ကို ခံယူထားကြောင်း ခန္တီဝါဒ ဆိုသည်မှာ မိမိကိုယ်ကို ဆဲရေးသူအား ဖြစ်စေ၊ ရိုက်ပုတ်ညှဉ်းဆဲသူအား ဖြစ်စေ အမျက်ဒေါသ မထားဘဲ သည်းခံခြင်း ဖြစ်ကြောင်း ရှင်းလင်းပြောပြသည်။
ထိုအခါ မင်းသည် ပါးကွက် အာဏာသားကို ခေါ်၍ ဆူးတပ်ထားသောကြိမ်ဖြင့် ရသေ့ကို ရိုက်နှက်စေသည်။ ရသေ့ကား မမှုပေ။ ထိုအခါ မင်းမိုက်သည် ရသေ့၏ လက်နှစ်ဖက်နှင့် ခြေနှစ်ဖက်တို့ကို ဖြတ်စေသည်။ ရသေ့ကား အမျက်မထွက်ပေ။
မင်းမိုက်သည် ရသေ့၏ နား၊ နှာခေါင်းတို့ကို ဖြတ်စေပြန်သည်။ ရသေ့ကား မမှုပေ။ သည်းခံ၍သာ နေသည်။ ထိုအခါ မင်းမိုက်သည် ရသေ့၏ ရင်ဝကို ခြေထောက်ဖြင့် ကန်ကာ ထွက်ခွာသွားလေသည်။
မကြာမီ စစ်သူကြီး ရောက်လာသည်။ ရသေ့၏ ဒဏ်ရာများကို ပြုစုပေးသည်။ အရှင်ဘုရား-အမျက်ထွက်လိုလျှင် ကျူးလွန်ပြစ်မှားသော မင်းကိုသာ အမျက် ထွက်တော်မူပါ။ ပြည်သူများကိုကား အမျက် ထွက်တော် မမူပါနှင့်-ဟူ၍ တောင်း ပန်၏။
ရသေ့က -ငါသည် မည်သူ့ကိုမျှ အမျက်မထွက်ပါ။ ငါ၏ လက်၊ ခြေ၊ နား၊ နှာခေါင်းတို့ကို ဖြတ်ခဲ့သော မင်းသည် သက်တော်ရှည်ပါစေ-ဟု ဆုတောင်း၏။ သို့ရာတွင် မကောင်းမှုပြုခဲ့သော ကလာဗုမင်းသည် အပြစ်မှမလွတ် ဥယျာဉ်တံခါးဝသို့ အရောက်တွင် မြေမျိုခံရပြီး အနိစ္စရောက်သွားလေသည်။
ရသေ့သည်လည်း ထိုနေ့၌ပင် လွန်တော်မူရှာသည်။ စစ်သူကြီး မင်းပရိသတ်နှင့် ပြည်သူအပေါင်းတို့သည် ရသေ့မြတ်၏ အလောင်းတော်ကို ပူဇော်၍ ရိုသေစွာ သင်္ဂြိုဟ်ကြကုန်သည်။
ရသေ့မြတ်သည် ကောင်းရာသုဂတိသို့ လားပြီးလျှင် ဘ၀များစွာ ကျင်လည်ပြီး နောက် ဂေါတမမြတ်စွာဘုရား အဖြစ်သို့ ရောက်တော်မူ ခဲ့လေသည်။
အကိုး။ ။ ၅၅၀-ခန္တီဝါဒီဇာတ်။
No comments:
Post a Comment